هذه القصة منشورة كما وردت ولا تعبر بالضرورة عن الصفحة
ياالهي اديش في ظلم بالدنيا 😔
كيفكن
حبيت احكيلكن قصتي لان قصة ايات الرفاعي رجعتلي الماضي كلو بلحظة وحدة انا تزوجت عمري ١٥ سنة اول يوم تزوجنا في فقت لقيت أمو حاطة كرسي جنب الباب وناطرة بتقلي يلا هاتي لشوف (قصدا عل .........) قلا ابنها وقتا انو ما صار شي ومامشي الحال عذبتني قالتلو طلاع لقلك وسكر الباب وسلختني كفين ولفت شعري على ايدا قالتلي ماعنا نسوان تقول لاء وهلاء بتصل بأهلك بقلن بنتكن عايبة ماعم تخلي ابني يقربلا (طبعا اهلي فهموني من بيت اهلك للقبر رجعة مافي طلاق بل عيلة مافي وبدك تستحملي ووووو وهل كلام الجاهل) 
وبعدا نادتلو وانا ما استرجيت افتح تمي وصار وكانت اسوء لحظة بحياتي ..
تاني يوم اجو بناتها وسلايفي كلن وقضو نهارن عنا وراحو المسا الا سلفي الكبير اتأخر الوقت وضل نايم فابتجي حماتي بتفرشلي بل بأرض غرفة تانية شرشف وبتقلي نامي هون سلفتك حبلة مافيا تنام غير على التخت وجوزي طبعا مالو كلمة ونمت ليلتا وطول الليل عما ابكي .ااااه من هديك الايام
اجو اهلي بعد اسبوع زاروني وجابولي نقوط معهن اول ماراحو بتناديلي وبتقلي حماتي هاتي صندوق دهبك لخبيلك يا عندي قلتلا خلين معي واللهي حطت ايدها على راسها وبلشت صريخ اجا جوزي وعمي على صوتا وقالتلن قلعوها لبيت اهلها هل وقحة وانا متت خوف شو ارجع بعد اسبوع رحت مسكتو وعطيتا ياه ما خلت الا محبسي معي وعم تمرق هل ايام بل ضرب والذل وانا عم انطفى واهلي ماعندن غير طولي بالك الست الاصيلة بتصبر كلنا تعذبنا الزواج هيك كلو عذاب ...
ياما ابكي بهل ليل وجوزي كان متل اللعبة بايد امو مابيطلع صوتو ادامها .. منكتر ما كنت اتعب بل شغل واكلي ضعيف نزلت ٥ مرات كلو هاد بسنة ونص .لحد ما ثبت الحمل وصار وقت الولادة..وانا كنت حاجزة بل مشفى عند دكتورتي فلما حست اني عما اولد بتتصل بقابلة بتعرفها ولدتني بل بيت ومتت وعشت وسمت الولد على كيفها وحرقت قلبي على حالي وعمري
اد ما حكيت مارح تصدقو بعرف كانت ظالمة متكبرة متجبرة واولادها متل اللعبة بتمشيهن بس لان بعاد مو متأثرين متلي
اول ماصرت ١٨ صارت الحرب واهلي سافرو برا البلد وتركوني لحالي اضطرينا نغير المحافظة
اول ما انتقلنا واستقرينا قالتلي دبرتلك شغل لتساعدي عمك وجوزك بل مصروف طلعت مدبرتلي شغالة عند جماعة من الصبح للمسا وايا اعتراض بتقلعني وبتاخد ابني وانا مالي حدا .(رح تقلولي ليش هل ضعف طب عمري ١٥ لا دارسة واهلي عقلن حجري ومافي سند شو ممكن ساوي هيك كنت فكر بلحظتا ) شغلتني سنتين لفاية وتاخد كلشي بيجيني وعم اكبر وابني عم يكبر اااااااه يا ابني يا حرقة قلبي انت .هديك الايام كانت العالم عم تبيع وتسافر وتهاجر وكان في واحد بل حارة عم يأمن طلعت الناس من الشام لحدود تركيا.انا كبرت براسي وقلت بدي اهرب انا وابني لان اد ما كتبت قليل عن يلي صار فيني
بوقتا انعمو عيوني سرقت الدهب كلو تبعي وتبعها وبعت نص وعطيتو للزلمة يلي بدو يهربني مع ابني ويومها كانت الطلعة ٤ الصبح انا اول ما صار الوقت واللهي ببجامتي لبست حجابي وجاكيتي وحاطة كم غرض بشنتة صغير صارت اربعة حملت ابني وهوي نايم وكلن نايمن وفتحت الباب ومن رعبتي ما سكرتو يومها يالللله عم اكتب وحاسة نفس الخوف يلي كنت عايشتو هداك الوقت .
يومها بتزكر لما طلعت من الشام للحظة قررت ارجع بس وين لعند هل ظالمين او اهلي يلي تركوني وراحو ومابيسألو عليي بل شهر مرة .كملت طريقي وبقيت ٣ شهور لفتت تركيا وتعرفت على جماعة طالعين على اوربا وانا ضايل معي كم قطعة دهب رح اختصر لان كمان دقت السم بتركيا وعلى الحدود وغير التحر.ش والجوع والمرض والذل
انا طلعت بل بلم وقلت انا بل اصل ميتة ومالي سائلة بس هل مرة مو انا يلي متت مات ابني غرق البلم وقع مني وليل واصرخ وابكي ودورنا كتير كانو البحر اكلو جنيت بعدها ورجعنا على تركيا قبضو علينا وسجنوني وطلعت حاولت انتحر كتير
انا السبب انا قتلتو مشان اهرب من الظلم ظلمتو يارب يسامحني
هلء عمري ٢٨ ساكنة مع صبايا بسكن عم اشتغل واصرف على حالي ..مابعرف انا خسرت ولا ربحت
هربت من الظلم بس وجعي صار اكبر كل يوم بقول معقول كان لازم ضل انا غلطت بس لو بقيت اخرتي متل ايات الرفاعي
من الضرب والذل .وصلني اخبار انو قال هربت مع عشيقي واهلي تبرو مني حاولت اتواصل معهن قالولي انتي ميتة ماعنا بنت باسمك
مابعرف ليش كتبت كان لازم احكي بدي حدا يسمعني بوحدتي بدي حدايقلي انتي غلطي ليش لتهربي وتروحي ابنك انت انانية انتي ظالمة
او يقلي كان لازم الموت الك
كل يوم بشوفو بمنامي وبفيق بحالة الله اعلم فيها .
انا اختصرت كتير وجع وقهر بدكن تدعو عليي ادعو بس بل موت وانو ابني يسامحني وبس.